Lover og instruksar PST må følgje
Arbeidsmetodane til PST og måten vi løyser oppdrag på, er strengt regulerte.
Arbeidsmetodane til PST og måten vi løyser oppdrag på, er strengt regulerte.
Det rettslege grunnlaget for verksemda til PST går fram av politilova kapittel III a. Oppgåvene våre er beskrivne i politilova § 17 a og b.
Politilova § 17 c gir i tillegg PSTs hovudkontor (Den sentrale eininga (DSE) i oppgåve å utarbeide trusselvurderingar til bruk for politiske myndigheiter, samarbeide med politimyndigheiter og tryggings- og etterretningstenester i andre land og dessutan gjere personkontroll til bruk ved tryggingsundersøkingar.
PST skal òg vere fagleg premissleverandør og gi innspel og avgjerdsunderlag til Justis- og beredskapsdepartementet og regjeringa i tråd med samfunnsoppdraget vårt. Innanfor dei tilgjengelege ressursrammene og der det blir rekna som tenleg, skal vi utføre opplærings-, rettleiings- og informasjonsoppgåver overfor aktørar vi samarbeider med. Ei anna viktig oppgåve er å halde allmenta nødvendig orientert om trusselbiletet.
Som tryggingsteneste og polititeneste kan PST bruke tvangsmiddel for å førebyggje og etterforske alvorlege straffbare handlingar som følgjer av mandatet vi har. Nokre døme på tvangsmiddel kan vere ransaking, overvaking eller kommunikasjonskontroll.
Å bruke tvangsmiddel i førebyggjande verksemd betyr at PST bruker metodar, til dømes telefon- eller romavlytting, for å førebyggje at nokon gjer ei straffbar handling i framtida. Dette skil seg frå bruken av tvangsmiddel som ledd i etterforsking elles, der tvangsmiddelbruken skjer som eit ledd i å samle bevis i samband med at ei straffbar handling allereie har skjedd eller er (snarleg) i ferd med å skje.
I Noreg er det berre PST som har høve til å bruke tvangsmiddel for å førebyggje alvorlege straffbare handlingar, til dømes ved å innhente personopplysningar. Desse verkemidla er vi svært varsame med å ta i bruk.
Etterforskinga i PST følgjer dei alminnelege reglane i straffeprosesslova og påtaleinstruksen. Det er Det nasjonale statsadvokatembetet (NAST) som utgjer den høgare påtalemakta for PST og bringar sakene inn for retten.